Castro, Francisco
Vigo, 1966
Naceu no barrio de Teis, en Vigo, en 1966. Dirixiu Editorial Galaxia durante sete anos.
Fotografía: arquivo do autorBiografía
Dentro da súa produción literaria podemos destacar, entre outros Play-Back (Premio Lueiro Rey de Novela Curta, 1997), os libros de relatos A canción do náufrago (2001), Xeografías (finalista do Premio de Narrativa Erótica Positivas, 2001), a novela histórica Memorial do infortunio (2003), Xeración perdida (2004, premio Cartafol de Vieiros ao mellor libro do ano) e os libros para mozos Un bosque cheo de faias (2004) e O ceo dos afogados (2007), distinguidos ambos os dous co premio Frei Martín Sarmiento que conceden escolares de toda Galicia. No ano 1999 foi Premio de Xornalismo “Manuel Reimóndez Portela”, no 2002 obtivo “O Facho” de poesía pola obra Matar a Walt Whitman moitas veces e en 2005 o Premio Rosa Reboredo de Narrativa da Asociación Cultural Galega de Cornellá, polo relato Venres Desesperado (look casual friday) e o Premio Modesto R. Figueiredo de narracións breves polo traballo Ningún fascista morreu inxustamente. Premio Blanco Amor de Novela (2005) pola novela Spam, coordenador dos Diálogos Literarios de Mariñán no 2006 e Premio de Novela Manuel García Barros 2007 pola novela As palabras da néboa. Abriu en Internet un dos primeiros blogs de autor dedicados ao debate literario e a información cultural (www.franciscocastro.gal).
Ten publicados 21 libros entre os que destacan a novela para pequechos Chamádeme Simbad (2009) que entrou na Lista de Honra do IBBY 2012 e recibiu o premio como Mellor Libro Infantil na web Fervenzas Literarias outorgado polos lectores e lectoras, así como o Frei Martín Sarmiento de 2011, e, para un público máis xuvenil, O segredo de Marco Polo (2010). Foi Presidente de Gálix entre 2010 e 2014. No ano 2011 publica unha nova novela para adultos titulada In Vino Veritas, e en 2012, asina, con Fina Casalderrey, o libro de relatos O neno can (seleccionado na Lista do Centro IBBY de Documentación para Nenos con Dificultades Especiais de Oslo, premio Frei Martín Sarmiento 2014), e tamén Premio Frei Martín Sarmiento e incluido na Lista de Honra CLIJ 2014. En 2013, a súa novela O corazón da Branca de Neve gañou o Premio de Novela por Entregas de La Voz de Galicia. Publicou, en 2014, a novela xuvenil Tes ata as 10 (publicada por Suma de Letras en setembro de 2015 e que en 2016 recibiu o Frei Martín Sarmiento) e na colección de adultos Amor é unha palabra coma outra calquera en 2016.
No mesmo ano, Barricadas de Sal e en 2018, Iridium (publciado en todas as linguas do estado), incluído na Lista de Honra OEPLI 2020 e na Lista Internacional IBBY de Oslo 2020 como un dos mellores libros do mundo sobre o tema da discapacidade. En 2020 publicou a novela (ao tempo en galego, castelán, catalán e éuscaro), Tantos anos de silencio e en 2021, tamén en todas as linguas oficiais do estado español, a novela O cemiterio de barcos.
Este libro entrou no catálogo da OEPLI como un dos mellores libros de toda España do ano 2021.
Desde o ano 2003 imparte Obradoiros Literarios para todos os chanzos de idade.
En 2018 entrou a formar parte do Consello da Cultura Galega na sección de Pensamento e foi Director da Escola de Letras da Deputación de Pontevedra. Ese mesmo ano recibe o Premio de Periodismo Enrique Guerrero Serrano, convocado pola Asociación Cultural Espazo Aberto do Val Miñor.
En 2020 entrou a formar parte da directiva da Asociación Galega de Editoras.
En 2021 foi recoñecido como Vigués Distinguido polo Concello de Vigo.
No ano 2022 publicou o seu primeiro ensaio titulado Isto SI é un home, e o libro Eso no estaba en mi libro de los Beatles e gañou o premio Pura e Dora Vázquez de Literatura Infantil e Xuvenil pola súa obra Xoán, Xoana.
Como músico, publicou recentemente o seu primeiro disco, Agora é o tempo.
Bibliografía: Editorial Galaxia
Paradas bibliográficas
Xeración perdida
Esta novela fala de Ricardo, un mozo que pasa droga e quere abandonar ese mundo. É tamén o relato da súa xeración, a xente do seu barrio e do seu tempo: os que tiñan pouco máis de dez anos cando Franco morreu, cando os Bee Gees campaban nas radios.
Edición en galego
Editorial Galaxia
O corazón da branca de neve
Esta é unha novela policial e de suspense que xira arredor das pescudas do inspector Hermida para atopar unha bebé roubada a unha rapaza inmigrante. Mais é tamén unha novela arredor das bandas criminais que fan negocio cos seres humanos. Polo medio, intriga e tensión narrativa para unha historia que pode estar acontencendo agora mesmo en calquera das nosas cidades. Un reto para un inspector canso e sagaz, ante o caso máis difícil da súa carreira de investigador. «O Corazon da Branca de Neve» recibiu o Premio de Novela por Entregas 2013 de La Voz de Galicia
Edición en galego
Editorial Galaxia
Tes ata as 10
Antonio non daba creto ao correo que viña de entrarlle no seu ordenador. Era de seu pai. O problema é que o seu pai leva morto un día. Así arranca esta trepidante historia de intriga e suspense na que Francisco Castro constrúe unha trama que contén, á súa vez, moitas historias distintas.
Edición en galego
Editorial Galaxia
Barricadas de sal
Falar de Teis é falar do movemento obreiro de Vigo e Galiza. As loitas mantidas na industria naval, enmarcadas na reivindicación de dereitos laborais e políticos, aportaron cambios que beneficiaron a toda a sociedade, aínda que moitos sectores sociais se abstivesen de participar.
Edición en galego
Editorial Elvira
Amor é unha palabra coma outra calquera
Carla, a protagonista desta novela, organiza a vida arredor do amor, do seu amor, do amor co que vive, do amor que soña, do amor que lle falta. O amor aprendido nas películas rosa, nas cancións melódicas, nas novelas cursis.
Edición en galego
Editorial Galaxia
Últimas noticias de Sara Silva
A famosa escritora de novela erótica Sara Silva aparece colgada no vestiario do ximnasio ao que acudía. Xunto a ela atópase unha curiosa nota: «Se hai que morrer, ou matar, que sexa por amor». Aínda que a escena presenta todos os indicios dun suicidio, Carlos de la Iglesia, inspector de policía e exmarido de Sara, sabe que ela xamais faría algo así. Na súa investigación descubrirá que tras o aparente suicidio ocúltase un mundo onde a cobiza, o engano, a fama e a vinganza protagonízano todo, e desentrañará un misterio cuxa clave se atopa nun manuscrito desaparecido: a última novela de Sara Silva.
Editorial en castelán
Roca Editorial