mapa literario
vigo cidade literaria
descubrir a cidade a través da literatura
Vigo, a cidade máis poboada de Galicia, é tamén un importante escenario de obras literarias. A historia, a cultura, os costumes e a paisaxe da cidade inspiraron desde clásicos da literatura universal ata obras contemporáneas.
A cidade conta cunha traxectoria literaria relevante, que se remonta a séculos atrás, cunha comunidade literaria activa, que inclúe escritores e escritoras, editoriais, bibliotecas, librarías e outras entidades culturais.
VIGO: LUGAR DE MEMORIA
O historiador francés Pierre Nora acuñou o termo lugar de memoria para designar aqueles espazos nos que se cristaliza e se refuxia a memoria colectiva; é dicir, non se lembra calquera lugar, senón aquel no que a memoria actúa.
VIGO ARQUITECTÓNICO
A arquitectura señorial da cidade, representada polo Teatro García Barbón, o edificio Simeón, El Moderno, a Casa da Condesa de Bárcena, a Escola de Artes e Oficios ou o Museo Quiñones de León, entre outros, reflicte a historia, cultura e identidade do pasado, do presente e do futuro da cidade.
VIGO INDUSTRIAL
O Vigo industrial desaparecido é un fenómeno reiterado nas obras literarias que recollen a transformación da cidade desde a súa época de apoxeo industrial ata a actualidade. Vulcano, A Panificadora, Alfageme, La Industriosa, La Artística ou Álvarez son só unha mostra dun legado de ruínas industriais que evocan o pasado da cidade; nas obras incluídas no proxecto quedarán inmortalizadas, contribuíndo a que eses lugares sexan lembrados mesmo despois de desapareceren ou transformarse.
VIGO E OS SEUS BARRIOS
Lugares como a Porta do Sol co Sereo son testemuñas de moitos acontecementos das nosas vidas e das historias de ficción ou ficcionadas que recollen estas obras. O barrio de Teis, testemuña directa dunha xeración perdida e das revoltas obreiras; O Berbés, barrio mariñeiro orixe da cidade, como lembranza das tradicións viguesas, que dan nome a moitas das rúas e prazas do Casco Vello; sen esquecer o Calvario, reflexo da unión veciñal.
VIGO CULTURAL E NOSTÁLXICO
No ámbito cultural, a nostalxia por espazos emblemáticos como o café Derby, o Suízo, a casa de baños A Iniciadora, o teatro Fraga, os cines Tamberlick ou o Roxy, axuda a manter viva a historia da cidade e achega ás persoas unha sensación de conexión co pasado.
VIGO RURAL
A novela escrita sobre a cidade relata a evolución —de ambas— e mostra a importancia da relación entre o espazo e a orde social, como os espazos mudan non só no aspecto senón tamén na identidade. Barrios como o de Coia, símbolo dun barrio obreiro nunha cidade industrial en expansión, en contraste con parroquias como Zamáns, Candeán ou Valadares, que conservan o seu carácter rural e rodean a cidade cun fermoso manto verde.
RÍA DE VIGO
O mar tamén xoga un papel esencial na cultura viguesa. A cidade ten unha longa tradición de pesca e navegación, e a ría de Vigo é un tema recorrente na literatura, destacando os seus prezados areais e, como máximo tesouro, as Illas Cíes, porta de entrada á ría desde o mar aberto.
Repositorio literario
Referencias
Novelas
Autores/as
Liñas troncais
Distintas visións sobre vigo
Proxecto de colaboración entre organizacións e participación cidadá
Contacto
986 267 759
bpneiravilas@vigo.org
Biblioteca Pública Municipal Xosé Neira Vilas
Avda. Martínez Garrido, 21
36205 Vigo