fuentes, moncha

[…] cruzando pola Praza de España, deixando os cabalos de Oliveira a gabear desesperados cara á frescura do azul, baixando a Gran Vía a un ritmo frenético, entolecida, envisa, sen ollar para os escaparates, os mobles de deseño, os prezos inasequibles, Roche Bobois, Edra, Sirvent […]

[…] atravesando polo semáforo do Santa Irene, aquel sol desapiadado a chuchar a pedra da escultura de Silveiro no vórtice das Travesas, e os coches, o ruído incesante, as mulleres con carros da compra subindo por Castelao […]

[…] nin as Cíes esplendorosas, nin as Sisargas, nin Cortegada, in o Con do Chirleu, aquela illa de madeira renxente e couza devoradora […]

[…] pousado naquel estirpeiro mesto que ambos os dous atoparan nunha das múltiples paseatas pola Serra do Galiñeiro, o lugar que el tanto lle ensinara a amar, e , esta noite non, mentres a voz de Paula sedosa e firme se facía ouvir no carto […]

[…] Paulo dicindo, achégote onde querias, pois ben, eu vivo por Travesas, no comezo de Castelao, non te molestes, va por Deus, será un pracer, en serio, el dicindo, teño o coche aquí preto, podemos tomar algo se che apetece e, xa os dous no camiño da Seara ceando no Danubio unhas navallas á prancha e carne guisada […]

[…] un campamento do Oeste cheo de colonos que viñero traballar a Álvarez, a Barreras, a Citroën, e que todas as fins de semana desertan para retornar ás súas tribos da Limia, de Sober, de Viana, e regresan os domingos pola noite nunha serpe cobregueante que fai tapón no Porriño […]

[…] a min aquilo da soidade non me parecía nada atroz e, pola contra, era unha auténtica ledicia descubrir o que quedaba do barrio mariñeiro de Poboadores, ou a caracola insólita de Canadelo, gozar do deambular anónimo polas ruelas máis antigas do Calvario ou polos incribles labirintos de Cabral e, sobre todo, polas tabernas da Guía ou da Madroa.

[…] mentres os estudantes vos manifestabades en Compostela, Organización Obreira repartía en Vigo os panfletos chamando á Folga Xeral e á manifestación ás oito da tarde na Porta do Sol […]

[…] mentres a palabra traidores reverberaba polos montes do Galiñeiro, estoupaba nos cumes do Alba e polas corredoiras do Aloia, mentres pairaba, coma unha néboa esfiañada, sobre as cabezas dos que permanecían no piñeiral, pendurada, para sempre, de frouma tesa das árbores.

E, por certo, Paulo continuaba a falar, tamén Valentín me ten contado, iso si, anos despois, que os primeiros panfletos coas siglas OO se fixeron nunha multicopista do instituto Santa Irene, nas Travesas, que lles emprestara o secretario, D. Rufo, e que instalaran o aparato na Travesía de Vigo […]