Pastores do Galiñeiro
No cume do monte Galiñeiro

Arredor do Galiñeiro coñeces detalles que se contan na familia. O avó vivía con intensidade o monte. Nos días de moita farfalla ou cando viña un baión, metíase nas cavidades de pedra que tantas lendas agocha. A unha dela chámanlle A Cova da Becha en referencia a unha enorme serpe que de menú favorito tiña ovellas e cabras. Pois iso, disque facíanlle ofrendas como os indíxenas amerindios que miraches esoutro día nun documental da tele de cable.

Folga de 1972
Factoria Hijos de J. Barreras
Avenida de Beiramar,2

Onte dixéronme que as malleiras en Príncipe están sendo moi duras e a xente non resiste. Por iso fixen ben en aceptar os consellos do Moncho de Barreras, para adiantarnos ás intencións policiais marchando dende o 10 ao monte ou a casas seguras. Así a nosa organización non será descabezada.

Bou Eva
Praza do Berbés

Pero hoxe a rota lévate até o novo Bou Eva, na rúa Terzo de Fóra, que non che resulta doada de atopar. Acodes a unha conferencia de Conchita Nogueira. Pouco sabes dela agás que é unha das nenas do Bou, así coñecidas no Berbés tras a morte de seu pai e nai.

Emigración europea
Rúa Cánovas del Castillo, 3-5
(Estación Marítima)

Entrades na Estación Marítima. Un home, revestido de autoridade, solicita os papeis, mentres outro revisa os contidos da maleta e saca que arrastras. Mándanche asinar. Fas un garabato como ben podes. Continúas. Entón decátaste que unha reixa metálica te serpara xa de Vigo.

1984
Tres folgas xerais
Vía Norte

Mentres agardas, repasas as mobilizacións acontecidas en Vigo dende a xornada de loita do 15 de abril do 83. Nesa data fora un paro parcial, polo mediodía, que contou cunha formidable resposta: transporte, centros de saúde, medios de comunicación, comercio, mercados… Todo parara. E aqueles que non querían, como os grandes almacéns ou oficinas bancarias (coaligazón capitalista transnacional), foron advertidos por piquetes para axiña saír fóra e unirse á manifa.

Fundación Penzol
Praza da Princesa, 2

Un día chamáronte do Concello de Vigo para asistir á sinatura do convenio coa Fundación Penzol. A sede trasladouse á antiga casa consistorial, que para o teu pai sempre foi a Casa da República, situada entre a praza da Constitución e a praza da Princesa, co Sereo de Leiro á vista.