Silvia, unha excelente actriz de dobraxe, é asasinada no terceiro soto do aparcadoiro próximo ao estudo de Santiago de Compostela onde ela traballa habitualmente. Estrangulárona e na súa boca aberta sen lingua aparece unha bóla de papel onde o asasino escribiu: Take 1.
Un par de días despois do crime e a tarde posterior á incineración da muller, nun estudo de dobraxe de Vigo, aparece morto Willy, un técnico de son co que ela e Rafa -o director que atopou o corpo de Silvia- formaban un trío insubstituíble. O seu cadáver aparece na sala de mesturas estrangulado e con cinco dos seus dedos cortados cunha ferramenta similar á que utilizaron para mutilar á súa compañeira. Na pantalla, ao que aparentemente mira o corpo sen vida do mozo, pode lerse escrito co seu propio sangue: Take 2.
A conmoción sacode ao colectivo de actores de dobraxe que se move polos distintos estudos de Galicia. Areal, Valiño e a subinspectora encargados do caso son conscientes de que o tempo corre na súa contra. Un asasino en serie empezou a actuar e ninguén sabe en que momento pode volver facelo. A présa para atopar ao monstro deriva nun quebracabezas no que ningunha ficha parece encaixar.