O relato A voz das nereidas afonda no contraste de dous xeitos de entender a vida, representados polas praias e a cidade. O mundo máxico da mitoloxía, das lendas e respectuoso co acontecer do tempo, fronte a un mundo real pero tecnoloxicamente virtual, entregado á superficialidade e ao individualismo.

Desesperada ante unha situación laboral precaria, a protagonista de «A carteira» acepta un contrato temporal para repartir o correo na periferia dunha cidade que non coñece, nun barrio afastado que ela mesma denomina «Algures». A través dos seus ollos, Santiago Lopo mergúllanos na Galicia urbana e fainos partícipes de todas as dificultades ás que esta traballadora se enfronta no seu día a día.Cun abano de personaxes sorprendentes, o humor, a intriga e a denuncia social mestúranse nunha trama orixinal narrada de forma directa que nos apreixará dende a primeira páxina.