neira vilas, xosé

E vaise falando e escribindo de cousas que antes nin pensalo, vánselle poñendo nomes ós feitos e ás andainas de agora; xuntas, parlamentarios, dereitos con deberes e esquerdas contra dereitas comisións negociadoras, propostas e respostas, poderes normativos, coordinadoras, proxectos, asambleas, estados de opinión, bases constitucionais, lexitimidades, pre e para, e as palabras esparexen ideas —benvidas, se son para ben— ideas que medran e vanse inzando, e por iso andaron polas rúas de Vigo e da Coruña e de moitos outros lugares, aquel domingo día catro, milleiros de persoas con bandeira e pancartas, cantando o himno, que din os rumorosos, dándolle vivas ó que ha de vir tras desa xornada autonómica e das moitas xornadas que hai por diante…